鴉片煙館 Opium Addict

我同自己讲，写呢啲文字之前要将呢张专辑反复听好多次先落手。
沉寂两年，正如专辑介绍，汪峰依然依然不改浓情嘅人文关怀，我始终相信佢係中国摇滚乐坛嘅中坚力量。
流行并不可耻，摇滚亦绝非高尚，《信仰在空中飘扬》係一首引人入胜嘅曲目，但并非专辑中最好嘅音乐。
《春天里》、《当我想你的时候》都係通俗易上口嘅音乐，但至少捉得住人心，形同当年反复听《回忆之前忘记之后》嘅情景。
《母亲》係汪峰写畀妈妈嘅歌，亦係专辑中令我最“矫情”嘅作品。
单单几句“每当我在路上停下脚步，望着天空我都会看到你，每当我从荒芜的梦中惊醒，留着眼泪我都能感觉到你……”就令我变得十分“矫情”。
一首《再见青春》係对过去《晚安，北京》嘅压轴，定或者係一种回归？
净低嘅曲目，音乐都好摇滚，呈现出一个摇滚歌手应该有嘅反省，但呢种反省依然停滞。
“常常想，做音乐已经这么长时间，如果只是重复过去的一切，毫无意义。即使很完美，即使很悦耳，可对于我来说，已经没有了吸引力。只有不断地挑战和踏上新的土地，才会让我感到快乐。在这样一个时代，我们已经听够了那些陈旧的声音，而我也已经厌倦了那些曾经的繁华。只有书写崭新的未来是有意义的，重复过去是一种拖妥协，一种无奈，一种失败。”

但作为听者，专辑入面嘅歌都值得细听，呢度不再一一赘述。
但声明，排除《空空如也》一曲，呢首歌唔知点解放入专辑，事实真係可有可无。
如果中国有XIN爱金曲排行榜，呢首一定排前十。

发现汪峰《信仰在空中飘扬》，呢个月最大收获。

新年嘅第一夜，窗外有煙花綻放，夜空被刹時照亮。
大年初一嘅夜晚，久違嘅火樹銀花，望著窗外空中綻放嘅煙花，心情淡然。
忽然過年，忽然，我竟有閒暇靠住窗臺觀望煙火。
對於四處奔忙嘅人，溫暖總係黎得突然。

細個嘅時候，經常盼望過年，由秋天開始就癡癡噉等待新年嘅到來，盼望過年有好嘢食，新衫新鞋，利是錢，以及家長特別寬容嘅嗰幾日。
而新年就喺漫漫嘅等待中悄然黎到了。

窗外嘅夜空，綻放住五光十色嘅煙花，燦爛如花，美麗如畫。
我靠喺窗邊，目不暇接噉觀望燦爛嘅煙火，再凝視冷豔嘅夜空。
抬頭觀望那般星星點點、形狀各異、五顏六色嘅煙花，心中充滿著一種奇幻嘅感覺。
煙花，燦爛如花，消逝如風。
佢綻開嘅時候，係如此美麗；佢燃燒完畢嘅時候，消失得無影無蹤，仿佛不曾存在過。
佢美麗而充滿夢想，就如人生嘅某些時候。
喺呢個美麗而奇幻嘅夜晚，你可曾想起某個人，某個時刻，某個過往嘅故事？
佢有無勾起你嘅感傷、你嘅惆悵、你深藏心底嘅情懷？

望著煙花，我不禁想起曾經嘅理想，我將逝嘅青春年華，我嘅知音摯友。
曾經嘅意氣風發、高談闊論、相知相惜、志氣相投嘅純真情懷，曾經就綻放喺我哋嘅金色年華當中。
如今，理想搖搖欲墜，昔日摯友都天各一方，令人寂寞，令人無奈。
喺呢個煙花之夜，令人更加懷念曾經嘅美好時光。
你嘅人生，有邊一個階段好似煙花一樣充滿美麗？
好似煙花一樣光芒四射？
好似煙花一樣令人癡迷？
佢是否已隨風而去？
抑或，你嘅煙花正在綻放，而且將一直綻放落去？
 
　　
其實世界與往年無乜嘢唔同咗，除咗你同我嘅年齡。
沒乜嘢與過去唔同，除咗對人生嘅態度。
而今日，當我忽然回首，往事舊人，不由感慨。
舊人或許光榮，往事或許委屈，往事和舊人影響咗你同我嘅方向，但匆匆趕路嘅後來者，卻總係無時間追憶似水流年。

走出過去嘅回憶，喺呢個農曆新年開始嘅時候，請讓我目送你重新啟程嘅背影：你也許鏗鏘有力，也許步履蹣跚，也許目光堅定，也許左右為難，也許與人相隨，也許獨步天涯……
但對於所有嘅後來者，你同樣係行走喺歷史當中。

此刻，請容許我用泰戈爾嘅詩句為你祝福：天空中沒有翅膀的痕跡，你已經飛過。
祝：新年快樂。

一位與城市勾機鬥快嘅老人家，記錄住呢個城市嘅變遷。
選咗個唔多人嘅時間去睇，正值落班高峰期，一開始時嘅人潮、蛇餅已不見。
入到畫廊，大概接近關門時間，人並唔多，正好可以自己一個人慢慢欣賞。

照片裏面，有好多人嘅回憶，有呢個城市已經不複存在嘅歷史與文化。
期間，三三兩兩，有老夫老妻結伴到來；有與我一樣著住工衣落班前來參觀嘅上班族；亦有打扮時髦嘅潮人一族帶住自己嘅相機到訪。
每個人都會喺自己有回憶或受觸動嘅照片前面駐足，或沈思，或回憶，或緬懷，然後摞起相機再翻拍。
原來，望住前來參觀嘅人群，都係一件耐人尋味嘅事情。
雖然，展出嘅相片數量並唔多，但足以感動好多廣州“街坊”。
當然，仲有李老師嘅嗰一份執著與熱誠。

其實，部分照片嘅場景對於我來講算係陌生場景。
我未能有幸在有生之年踏足或見證住遠去嘅歷史變遷，好多謝李老師爲廣州記錄低每一寸歷史嘅光陰。
如陳sir所講，廣州拆得太快了，我們還來不及對歷史道別，呢次影展，係俾一次機會大家集體告別。
時光飛逝，城市不斷變遷，但願我們還能記得更多。
祝李老師身體健康。

《溫一壺月光下酒》係林清玄先生嘅一篇文章，將飲酒嘅文化向我哋娓娓道來。
所以題目同我以下所寫嘅無乜關系。
我只係對呢七個字産生咗興趣。
中國古人追求天人合一、和諧、通達嘅人生境界。
或者呢啲就係傳統文化嘅真正精髓，中國傳統嘅吸引力巨大，自然得到更多人嘅喜愛。

中國嘅傳統節日流傳至今，留卑我哋嘅印象似乎淨係得返一個“食”字。
無論係過年嘅年糕餃子、正月嘅元宵湯圓、端午嘅粽抑或係中秋嘅月餅，應景式嘅口腹之欲得到滿足之後，好少有人會追究呢啲節日背後嘅文化意義。
過節嘅方式亦一度被簡化爲：到乜嘢節日食乜嘢。
於是，普通嘅食物一躍成爲高檔禮品，而節日嘅味道，喺美食落肚之後卻只留低一片茫然。
唯一不變嘅係，每個節日都唔會缺少酒。
無論係過去抑或係宜家，好多人都鍾愛用酒來鬆弛神經、沈浸氣氛、點燃最熱烈嘅場面。
無辦法想象一個無酒嘅節日，正如你無辦法想象一個無月光嘅中秋節。

其實中國人嘅節日從來都會缺乏儀式感，除咗離唔開嘅酒同種種被賦予象征意味嘅食物，我哋仲有重陽節登高、中秋賞月、端午爬龍舟......
慶幸嘅係，除咗傳統正被逐漸被承繼及放大之外，宜家節日嘅面貌經過改良亦開始越來越“潮”，年輕化、時尚化。
重要嘅如過年，可以用短信拜年，神聖如清明，亦有網上祭奠。
潮人有激流嘅過節形式，而我呢啲傳統嘅人亦不拘泥於此。

呢個中秋，我哋依然會大大細細濟濟一堂，老觀點，守喺屋企一路啃月餅，一路摞住部手機SMS卑親朋友好友。
邊個話傳統節日同時尚有衝突呢？
祝大家中秋節快樂，臀臀圓圓！

公司組織咗一次學習活動，一睇個名就知同革莫道不消魂命有關。
不過都係個名啫，其實都係旅行。
呢次路線分開四條，一條去陝西，一條去四川，一條去安徽，仲有就係去江西了。
衝住媽媽嗰句“你趁後生就去黃山先啦”，我就選擇咗去安徽呢條線路。
顧名思義，去黃山應該幾辛苦。

呢次安徽條線路係咁安排嘅：黃山-屯溪-新四軍軍部（學習重點）-千島湖-杭州。

安徽。
安徽嘅丹山碧水莫過於用“一溪貫群山，兩岸列仙岫”來描繪。
到咗安徽，我哋可以感受集天下名山之大成嘅黃山。
喺現代城市中已經銷聲匿迹嘅馬車，溪流，鴨仔喺池塘中戲水，荷花無邊無際嘅綻放，以及古老房屋被晚霞映紅嘅美。
呢一切都足以令我領悟到西递古村＂舟行碧波上，人在画中游＂嘅恬静。

黄山。
黄山係以自然景观为特色嘅山岳旅游风景区，奇松、怪石、云海。
上山嘅当日，飘住雨雾，雾中看景虽然别有一番风味，但亦增加咗我地登山嘅难度。
各位要去黄山嘅朋友记得：睇景唔好行路，行路唔好睇景。
崖壁下嘅小路。


云海。
但凡著名高山，一般都可以见到云海。
但黄山嘅云海更有其特色。
特别係奇峰怪石、古松隐现云海之中就更加增添几份美感。
黄山一年之中有云雾嘅天气达２００几日，而且云来雾去，变化莫测。
一阵係风平浪静嘅一片汪洋，一阵係波涛汹涌，白浪排空。















黄山松。
黄山嘅松树确实同其它地方嘅唔一样。
苍翠浓密，与岩石错综交盘，佢哋都一律向住同一侧生长，每棵松树都有自己精选嘅位置，或悬崖，或峭壁，或绝顶。






团结松。




黄山最好嘅景色必须登上高峰先能够欣赏得到。
黄山嘅日出加上云海更係令公司Ｄ同事流连忘返。
可惜我懒训加上前一日行咗五个几钟先上到山顶，已经攰到唔想起身睇日出。
好啦，借口唔讲了，贴Ｄ同事影返来嘅日出景观。








山上食宿。
山上嘅餐饮价格同山下嘅有著天壤之别。
因为山上面嘅一砖一石，所有食物食水都系由挑夫一斤斤咁担上山。
所以喺山上面尽量以饱肚为主就好了，唔好太奢侈。

宏村。
旅程入面我自己最印象深刻嘅一站。
宏村依山傍水，山清水秀，古宅幽深。
行喺青石板铺就嘅巷仔入面，就好似喺古老嘅梦境里面倾听岁月嘅轻语。
听导游讲，宏村建筑，喺皖南众多风格独特嘅徽派民居村落中最具代表性嘅。
堪称“中华一绝”嘅牛形村落同人工水系，总揽全村。
村中各户皆有水道相连，层楼叠院与湖光山色交辉相映，处处是景，步步入画。
闲庭漫步，悠然之情令我相当心醉～～～









月沼。
位于村中央。并唔大，係一个半圆形嘅池塘，平滑似镜。
绕住月绍一圈都係明清时期嘅民居建筑。
民宅倒映入水中，空中微风轻拂，好似一幅天然流动嘅水墨画。









屯溪泾县。
一来到，就发现呢部当地獨有嘅三脚鸡出租车。





本次旅程学习重点......图片略欠。
各位凭吊参观，应该肃穆庄严。










屯溪老街。
老街具有徽派建筑风格，两层，红灰相间。
大扇临街嘅窗极为明亮，非常气派。
如果想买手信工艺品，可以喺呢条街入货。






“不吃汪一挑，白走老街这一遭”
五蚊一細碗，八蚊一大碗。
佢“碌”雲吞好似跳舞咁。

老街第一楼，位于老街街口，菜肴可口，而且好平。
我哋八个人食到好饱，都係百几蚊埋单。

千岛湖。

传闻中嘅千“赌”湖，有住“小三峡”之称。

话说Ｎ年前阿发哥拍“赌神２”嗰阵取过景，不过嗰时未开发，无依家咁靓。

千岛湖好大，碧波万顷，群山叠翠。

杭州。

杭州以其美丽嘅西湖山水着称。

所谓“上有天堂，下有苏杭”。杭州被称为全国佳旅游城市之一。

到步后，我哋首先去咗六和塔眺望钱塘江。

佛光普照六和塔。

钱塘江大桥。

去到西湖嘅时候，啱好太阳落山。

于是就集合其它同事嘅机型同角度影出来嘅呢个夕照西湖了～～

不夜雷峰塔。
話說頂部嗰舊嘢都係黃金制造嘅...

本来想租单车游西湖，十蚊一个钟。不过一部单车押金三百蚊。全部系单座嘅。

我哋八个人选择咗行路。其实步行游西湖都几惬意，同行某同事闻说诗兴大发，不过差壶酒。

第二日跟返大队游西湖，又撞啱落雨。

雨中苏堤。

湖中湖。

烟雨雷峰塔。

三潭印月。

杭州灵隐寺。

灵隐寺位于飞来峰旁边，离西湖好近。

传闻灵隐寺係一个许愿好灵验嘅地方，于是我哋几个人跟大队游完西湖就自己去咗灵隐寺一趟。

嗰度山峰奇秀，涧水流过，古刹钟声隐约可闻。

游完杭州，其实对杭州比较失望。

一来嗰度交通太繁乱，虽然街上靓车多，不过可惜当地人都无乜车品，至少我哋见到嗰Ｄ都係咁。

二来嗰度Ｄ司机喺旅游景点都拒载，一係就嫌你去嘅地方太近，一係就话要车你去另一个景点，因为佢有得收回佣。

迫于无奈，我哋选择咗坐当地公交车，当时已经係晚上八点。

等咗几十分钟后来先发现，我哋等嗰几架公交车一部收１７：００，一部收１８：３０。

天吖～～“最佳旅游城市”吖，Ｄ人真係唔使做咖～～咁早收工！

最后我哋步行至另一地点同其它人汇合。

去咗当地一间比较出名食小吃嘅店医肚，不过我哋都觉得嘛嘛哋，无乜特色。

食完离开返酒店嘅时候，又遇到一轮抢“的士”高峰！

原来喺当地坐的士係要抢嘅～～唔系你就唔使指意打到的！

最后，我哋用时一个钟，成功咁“抢”到部的士先返到酒店～～～唉～～～

第二晚，离开，杭州萧山机场。

虽然，萧山机场对比白云机场来讲可能只係一角。

不过都係一个国际机场。

杭州～係咁先啦！！～～

落咗幾日雨，今日起身發現終於無落雨了，但係溫度都係未回昇，仲係好凍！
有朋友喺blog度做咗春節倒數。
媽媽上星期已經買咗好多年貨返黎，將屋企Ｄ櫃塞到滿曬。
一齊買返黎嘅，仲有一幅對聯，准備年卅晚一左一右咁貼喺屋企大門上面。

依家嘅新年越黎越冷清了，記得細細個嗰陣，年卅晚總係會喺爺爺屋企過，因爲每年年卅晚就係爺爺牛一。
嗰時全家齊集曬十幾廿人，大人一圍，細路仔一圍。
依家大家陸陸續續分開了，結咗婚嘅，出嫁咗嘅，都變咗喺自己屋企過年。
其實過節嘅時候，我都重係好鍾意熱鬧嘅，突然好懷念以前成家十幾廿人其樂融融咁過春節。

人越大，週圍嘅朋友越少。
以前求其一召集，就可以揾到10幾個細蚊仔一齊玩仆喱喱，依家，想揾個人傾兩句都難。
有電話了，有網絡了，溝通嘅方式多咗，然後就缺乏咗溝通嘅熱情。
MSN上面百幾個人，每日都幾廿人online，由頭拉到尾，傾兩句就無反應嘅占大多數，可能大家都好忙啦。
同樣，人哋揾我傾計，都係兩句就無咗下文，或者......我都忙緊啩。